البنت ملبوسة وتبي شيخ يعالجها

حكى لي أحد الأصدقاء ..

وقـال :

مـده فاتت تعـرفت على عائلـه في منطقة ، وصرت بمرور الأيام

صديق للعائلة كلها . وشاءت الظروف أن إنقطعت عن زيارة هذه

العائلة فـترة لا باس بيها ..

وكان عند العائلة فتاة مكملة تعليمها وقاعدة في البيت ، وتقدم لها

ولـد خالتها يبي يخطبها ، ولكن البنت ما تبيه ، وأمها مصرة على

رايها بأن البنت للـولد وموش حتاخـذ غيره ، ولكن البنت رفضت

وقالت لايمكن نتزوجه ، وفي نهاية المطاف مثل هلبه من العجائز

قالت أمهـا هذا موش منها . هذه ملبوسة وإمدايرين ليها سحر باش

ما تاخـذ ولـد أخـتها .

أحنا ضروري ما أندورو شيخ إيعالج ها لبنية ..

وقـعـدت تسأل هاكه المرا عن الشيوخ ، حتى في يوم خبروها

عن شيخ فزاني موجود في المكان الفولاني ..

مشتله الرا .. وقالت له تبيه إيعاج بنتها ..

ووافق سيك الشيخ ، وحدد لها موعد إباش إيجي للبيت .

المهــم بعد أيام جاء الراجل للبيت .

والقي المرأة وأمعاها بنتها ..اللي حاولت إتفهم أمها ..

ولكن الأم أمسكره راسها ، وقالت إلها شيء ، إنت ماك صافي

إنت يا بنتي ملبوسة .. أنت راسك يابس ..

هاهو سيدي الشيخ جاء وتوه إنشوفوا

خرجت المرأة تقابل الراجل اللي خش للمربوعة ..

وقاللها : وين البنت .. هيا جيبيها ..

أنا عارف هي توه باتعصلق معاك ..

ولكن جيبيـها بالسيف .

[ندعوك للتسجيل في المنتدى أو التعريف بنفسك لمعاينة هذا الرابط]

دخلت المـرأة لبنتها .. وطلبت منها تمشي معاها للشيخ

والبنت رفضت ، وقالت لأمها يا أمي أنا ما فيا حتى شيء

أنا يا أمي والله ما فيا حاجة .. وولد خاتي مانبيه ..

الأم / يا بنتي أنت غير نوضي معاي ..

البنت / بري يا أمي أنا ماني ماشية ..

الأم / يا بنتي غير كيف مانك ماشية .. بتقعديلي هكي مريضة

هكي يا بنتي .. هيا نوضي ..

وتمسك فيها من دراعها ,, والبنت تفك في إيدها منها .

يا أمي والله هذا كلام فارغ .. يا أمي قلت لك ..

أنا والله ما فيا حاجة ..

وقدام الأم اللي اصرت لازم ما البنت تمشي معاها للشيخ

ولما البنت شبحت أمهـا بدت أعيونهأ زغللوا بالدموع ..

قالتلها .. خلاص خلاص ..بري توه إنجي ..

خلاص توه إنجي ,,

طلعت الأم مشت للمطبخ ، دارت شاهي وجاباته للشيخ ،

اللي قاللها أمال البنت وينها ..

كان هذا تـوه أنا اللي نمشيلها .. قالت الأم لالا هاي..

لا توه إتجي ,,

والبنت تسمع فيهم .. بعد أشوي جت البنت للمربوعة

وقالت للشيخ السلام عليكم ..

رد عليها .. وهو إيوشوش (يهمس) لأمها ..

الحمد لله طلع صاحبنا مسلم ..

وصرخ على البنت .. قعــمــز ..!!!!!

البـنت من خلعتها قعمزت بسرعة ، وكأنها رمت نفسها ..

وبدأ سيك الشيخ إيتـمـتم ..

وبعدين ولى يقرأ في آيات من القرءان ..

والبنت أتشوفله .. وفي نفسها تضحك عليه ..

لأنها هي متخرجة من الطب .. وعندها هذا كله خراف .

المــهم سيك الشيخ يقــرأ .. والبنت قدامة أمقعمزة ..

خبط الباب .. نطت البنت مشت للباب ..

وفتحت الباب والقـتني أنا .. فأضبطتني وقعدت تبكي ..

وأنا نسأل فيها .. شنو فيه .. خيرك .

وأتجهت للمربوعة .. ولاقتني الأم .. اللي نادت ..

الحمد للـه .. الحمد للـه .. الحمد للـه ياربي ..

شوفي حتى الغايب من زمان روح ..

شوره جلبه الشيخ .. فقلت شيخ شنـو ..

ووقفت قدام باب المربوعـة ..

واتفاجأت .. منـو (فولان ) ..

نط الشيخ واقف وأضبطني .. أهلا أهلا ..

أهلا بسيدي (فلان) .. كيف الحال..

وفي الكلام يوشوش لي .. أسترني الله يسترك ..

أستـرني اللـه يسترك ..

وطلقني وقعمـز أشويه .. وقعد يقرأ في آيات قرآنية ..

وبعدين قال خلاص .. توه ..

توه غـدوه عنـدنا جلسة ثانيـة ..

وجرج بسرعة .. ولحت عليه المرأة ..

وشورها يمكن عطاته أقروش (نقود) .

الراجل المسكين .. سيدنا الشيخ ..

هو لما شافني تلخبط ..

المهم لكمت الموضوع وسلم وعطوه ما كتب الله ..

وهرب روح ..

طلعت وراه فقال لي أسترني الله يسترك ..

وأنا ما عاد أنعاود مـرة ثانيه أبدا ..

ومشي الراجل في حاله .. ورجعت أنا لبيت الناس ..

وهدرزنا ، وبعدها روحت ..

بعد مدة الراجل نفسه ، جاء بيضعك على واحد عسكري

وبالصدفة كنت معاه في هاذاك اليوم ..

فلما دخل الراجــل .. والقاني ..

العسكري إيقوله تفضل يا سي الشيخ ..

والشيخ ولى إيقول للععسكري ..

خلاص .. لا خلاص .. إذا حضر الماء ..

لا خلاص .. بطل التيمم ..

هذا شيخنا ..هذا كبيرنا .. أنت معاك شيخنا .

قلت له أسكت ..!!!

[ندعوك للتسجيل في المنتدى أو التعريف بنفسك لمعاينة هذا الرابط]

القصة واقعية وكتبها هنا /

منيرتاج الدين منير
ـــــــــــــــــــــــــ
السيلاوي..الغريفة

قصة حلوة ورائعة وياريت الناس تتعلم من هده القصص وتبتعد عن هده الخرافات Evil or Very Mad

جزاك الله خيرا أختي أميرة الجبل

وكمـّلك الله بعـقلك الواعي ..

دمت ودام قلمك معبرا ونابضا بالحياة

وتقبلي شكري ..

الشيخ المشعوذ الطمع نساها فيه مثل يقول :

(( حبل الكـــذب إقصبـــر ))

قصة فيها عبرة رائعة لام البنت وأمثالها ياريت يفهموا

في انتظار المزيد مثل هذة القصص ويعطيك الصحة.

*** بارك الله فيك ***

الأخت بنت الغريفــة

مشكورة على تصفحك المنتدى ووصولك صفحتي

وقراءتك موضوعي وإبداء رأيك حوله ..

ولك التحية .

هكذا المشعودين والدجالين يكذبوا على الناس

والمشكلة أنه فيه ناس أتصدق فيهم .

وناسيين أن الله هو اللي بيده كل شيء

شكرا أستاذ على ها القصة .

مشكور أخي منـير

على المـوع الغاية في الأهـمـية

إبني تاج الدين شكرا لك على إطلاعك على موضوعي

وإنشاء اللـه إستفدت منـه .

كانوا زمان حسي ما أيخبروا الناس لكبار هلبه المشايخ ، ولكن الشيابين

إيقولوا ياودي مشايخ حقانيين وقريب كلهم فزازنه يقعدوا بحدى جامـغ بورقيبه

في طرابلس ، وأما اللي نسمعوا بيه توه كله تبلعيط في تبلغيط .

وأنتم شنو ايكم في ها الكلام

أخي وحـيــد لك التحـيـــة

وأهلا بك في صفحتي وعنوانها(البنت ملبوسة وتبي شيخ ...)

أختنا ثريا أهلا بك من جديد ..

ومشكورة على مرورك بموضوعي وقراءته والتعليق عليه .